Eskopti dibar Dol

N’eus roud ebet eus un eskopti e Dol ac’hann da greiz an IX^vet kantved, nebeut amzer a-raok ma tarzhas tabut ar vammiliz a-enep Tours. An hini bihanañ e zachenn eo e-touez holl eskoptier Breizh avat ; hag un dachenn dibar ouzhpenn-se pa oa rannoù-douar strevet a bep tu o vont d’ober ar brasañ anezhi, ha dister-tre an nebeut parrezioù strollet en-dro d’e sez. Strevet e oa an hanter kant bennak a rannoù-se e pevar eskopti da gentañ, ha seizh goude-se : Alet (deuet da vezañ Sant-Maloù), Kastell-Paol, Rouen hag Evreux da gentañ ; Roazhon adalek 851 hag eskoptier Landreger ha Sant-Brieg e fin an X^vet / deroù an XI^vet kantved (s.o. ar gartenn). Un iskis a ballenn takonet, skeudenn e istor dibar, an hini voe tachenn eskopti Dol betek an Dispac’h, pa yeas da get.

Akord eo an istorourien a-vremañ, da heul Hubert Guillotel paneveken, pa gav dezhe zo dioutañ un hêrezh eus galloud politikel meroveat ar manati bet savet e Dol gant Sant-Samzun (VI^vet kantved) hag eus e berzh forc’hellek : un abati-eskopti, dibar e Breizh vihan ha pa veze kavet kement all war dachenn ar Franked betek an IX^vet kantved. Galloud un eskob zo bet eta moarvat gant Samzun hag an ebed a zeuas war e lerc’h, war o dalc’hoù e Breizh hag e Neustria a oa niverus dija da goulz Samzun sur-awalc’h, hag a greskas c’hoazh betek fin an IX^vet kantved, bep ma veze graet donezonoù nevez dezhañ.

Parrezoù eskopti Dol

Darn kreiz  an eskopti (43 parrez)